Народныя гулянні 22 чэрвеня адбыліся ў дзясятках населеных пунктаў Беларусі. У параўнанні з мінулым тыднем далучыліся новыя -- Быхаў, Бярозаўка (Лідскі раён), Старыя Дарогі, Нясвіж, Глыбокае, Ганцавічы... Людзі ў чарговы раз адгукнуліся на заклік збірацца на цэнтральных плошчах гарадоў кожную сераду, а 19-й гадзіне, пакуль у краіне не адбудуцца палітычныя і эканамічныя перамены.

Там, дзе Плошчы былі ачэплены, сабраць інфармацыю пра колькасць затрыманых цяжка. А вось там, дзе доступ на Плошчы быў, колькасць удзельнікаў вырасла ў сярэднім прыкладна ўдвая. Так, у Кобрыне мінулы раз выйшла 25 чалавек, цяпер — 60. У Бярозе 50 проці дзесяці. У Маладзечне — 200 проці 120, Светлагорску — 60 проці 30. У той жа час у Мазыры, Наваполацку, Полацку колькасць удзельнікаў не вырасла (60—100 чалавек).

Каля 150 чалавек выйшла на цэнтральную плошчу Пінска.

250 чалавек дэманстравала ў Баранавічах, ад 500 да 1000 — у Брэсце.


Дзясяткі чалавек выйшлі на плошчу ў Слоніме, прыкладна каля 70 — Ваўкавыску. Трохі больш за сотню гуляла ў Лідзе.

У Гродне пратэст набыў сюррэалістычны характар: пад гукі аркестру, пад прынесенымі БРСМам чырвона-зялёнымі сцягамі моладзь адказала 3-хвіліннымі апладысментамі на спробы затрымання здымачнай групы.

Ад 700 да 1000 чалавек выйшла на Плошчу ў Гомелі. Прыкладна 350 — у Магілёве.

Ёсць інфармацыя, што людзі выходзілі на Плошчы таксама ў Дзяржынску, Смалявічах, Жодзіне, Слуцку (шматлікія затрыманні), Салігорску, Барысаве (шматлікія затрыманні), Оршы, Жлобіне, Бабруйску, Вілейцы, Лагойску, Быхаве, Пружанах, Навагрудку, Століне, Чачэрску, Мёрах, Шклове, Мар'інай Горцы, Беразіне, Калінкавічах, Асіповічах, Белаазёрску, а таксама ва ўсіх абласных цэнтрах.

Беспрэцэдэнтна ўжо тое, што ў малых гарадах дзясяткі людзей дэманструюць сваё жаданне перамен.
Гэта таксама паказвае ступень болю ў грамадстве, і незадаволенасці палітычным і эканамічным ладам.
Людзі, якія выходзяць у рэгіёнах, свядомыя таго, што іх могуць затрымаць, звольніць, занесці ў чорныя спісы, і ўсё ж выходзяць.


Пратэсты нідзе не набылі гвалтоўнага характару. Нягледзячы на затрыманні і іншыя спробы застрашвання, сярод маніфестантаў панаваў гандысцкі дух.
 

Источник: http://nn.by/